Ekskurso al Grodno laŭ la spuroj de LLZ

dimanĉon, la 16an de decembro 2018

Kadre de la 19-aj Bjalistokaj Zamenhof-Tagoj ni invitas al ekskurso al najbara Grodno, en kiu Lazaro Ludoviko Zamenhof loĝis kaj laboris kiel kuracisto en la jaroj 1893–1897. Grodno estas urbo kun riĉa historio kaj valoraj objektoj.

Forveturo

Ni kolektiĝos antaŭ la sidejo de Bjalistoka Esperanto Societo ĉe la strato Piękna 3 (vidu la mapon).

La buso forveturos je la 7-a horo matene.

Programo

  • ni transiros la landlimom en Kuźnica Białostocka kaj veturos al Grodno, kie ni renkontos pollingvan ĉiĉeronon
  • vizito de la urbo: Malnova kaj Nova Kastelo (konstruita en la unua duono de la 18-a jc. por ĝeneralaj sejmoj de la Respubliko de Ambaŭ Nacioj; en tiu loko abdikis la lasta reĝo de Pollando, Stanisław August Poniatowski), la ortodoksa preĝejo al s-taj Boris kaj Gleb el la 12-a jc. ĉe la rivero Nemano, klasikisma sinagogo, la strato Kastela kun palaco de Ĥreptoviĉ kaj tabulo dediĉita al grodnaj judoj, la ĉefa Sovetia Placo kun katedrala baziliko al s-ta Francisco Xavier, teatro de trezoristo de Granda Duklando Litova kaj grodna starosto, Antoni Tyzenhauz. Ni serĉos la domon, en kiu loĝis Zamenhof, kaj vizitos la domon-muzeon de Eliza Orzeszko.
  • tagmanĝo
  • reveno al Bjalistoko ĉ. 20.00-20.30.

Prezo kaj servoj

Prezo de la ekskurso: po 140 zl por persono.

La oferto inkluzivas: veturon per turisma buso, servojn de gvidantino kaj ĉiĉerono en Grodno, tagmanĝon, enirbileton en la muzeo de Eliza Orzeszko, asekuron, paspermeson por eniri la Respublikon Belorusio en la senviza reĝimo.

Aliĝo

ekzemplo de pasporto-paĝo, kiun vi skanu kaj sendu

Por aliĝi, sendu ĝis la 7-a de decembro 2018 al la adreso ekskurso@espero.bialystok.pl:

  • la nomo(j)n de la partoprenanto(j), la urbon kaj telefonnumeron,
  • skanaĵon de la unua paĝo (tiu kun foto) de via pasporto
  • konfirmon de ĝiro de 140 zl al la konto de Bjalistoka Esperanto-Societo (n-ro 45 1160 2202 0000 0000 5482 1484).

Vi povas ankaŭ alporti la monon kaj la pasporton por fotokopii al la Esperanto-klubejo ĉiam, kiam okazas kursoj kaj renkontiĝoj. Aliurbanoj povos pagi kontante dum Bjalistokaj Zamenhof-Tagoj.

Atentu! La valuto de Belorusio estas la belorusa rublo. En la tago de la ekskurso vi devas havi kun vi pasporton validan dum ankoraŭ almenaŭ 3 monatoj post la fino de la ekskurso, en kiu troviĝos almenaŭ 2 malplenaj paĝoj.

Pliaj informoj

Se vi havas demandojn, sendu retlereron al ekskurso@espero.bialystok.pl aŭ kontaktu rekte la gvidantinon Iza Walentynowicz (tel. +48 602 407 533, walentynowicz.iza@gmail.com)

 

Bjalistoka Esperanto-Societo deklaras, ke la skanaĵoj de pasportoj estos tenataj en ĝia sidejo ĉe la strato Piękna 3 en Bjalistoko, uzitaj nur por necesaj formalaj celoj ligitaj kun la ekskurso (akiro de senviza eniro kaj asekuroj) kaj detruitaj tuj poste. La aliron al ili havos nur respondeculoj de la asocio organizantaj la vojaĝon al Belorusio: Przemysław Wierzbowski (prezidanto), Iwona Kondraciuk (sekretario) kaj Iza Walentynowicz (gvidantino de la ekskurso).
Fonto de la foto; permesilo: CC BY-SA 3.0

Respondi