Volontulu en Bjalistoko!

Ni serĉas volontulon, kiu laboros kun ni ekde aŭtuno 2017 ĝis majo-junio 2018.

Se vi:

  • estas veturema junulo (18-29-jara), civitano de Eŭropa Unio,
  • ŝatas aktive okupiĝi pri Esperantaj projektoj, kiel instruado de la lingvo aŭ preparado de aranĝoj,
  • volas dum 9 monatoj loĝi en la urbo de Ludoviko Zamenhof,
  • deziras ekkoni Pollandon, polajn kulturon kaj lingvon,
  • ŝatus renkonti diversajn esperantistojn kaj kunlabori kun ili,
  • konas Esperanton je almenaŭ baza nivelo kaj deziras plibonigi ĉi tiun konon –

ni havas oferton por vi!

Vi povas fariĝi volontulo en la programo de Eŭropa Volontula Servo (EVS)! En ĝi dum naŭ monatoj vi laboros kun esperantistoj de Bjalistoko en la sidejo de Bjalistoka Esperanto-Societo, havos la okazon labori en Esperanto-biblioteko, (kun)gvidos kursojn de la lingvo aŭ helpos ilin prepari, partoprenos en la organizado de diversaj E-eventoj, kunorganizos multlingvajn renkontiĝojn de Bjalistoka Lingva Kafejo. Vi havos la okazon ekkoni novan (aŭ ne) landon, ĝian kulturon, loĝantaron, lerni la polan kaj aliajn lingvojn.

La volontulo eklaboros en Bjalistoko la 1an de oktobro 2017, sed la daton ni povas eventuale fiksi laŭ ĉies bezonoj (la projekto povos komenciĝi pli aŭ malpli frue). Eŭropa Komisiono en EVS garantias por vi inter alie:

  • plenan pagon de vojaĝo al la loko, en kiu vi laboros, kaj reen post la programo
  • plenan pagon de kostoj de loĝado (kutime en aparta ĉambro de studenta domo aŭ apartamento)
  • pagon de materialoj bezonataj por via laboro
  • poŝmonon por kromaj elspezoj (ĉ. 85 € ĉiumonate) kaj monon por manĝaĵoj (ĉ. 95 €)
  • plenan vivasekuron dum la volontula servo
  • urban trafikbusan bileton kaj bileton por aliaj labortaskaj lokoj
  • trejnadojn (antaŭ forveturo al Pollando, tuj post alveno kaj meze de la programo)
  • kurson de la pola lingvo (aŭ, se vi ĝin konas, de iu alia)
  • post la programo vi rajtos ricevi la atestilon YouthPass, kiu certigos ĉion, kion vi dume lernis kaj pri kio okupiĝis
  • helpon de prizorgantoj el la gastiganta kaj kunordiganta asocioj

Krome vi povos ekkoni aliajn eksterlandanojn, kiuj – same kiel vi – estos eŭropaj volontuloj en Bjalistoko kaj en aliaj urboj. Vi povos kunlabori kun ili pri diversaj projektoj kaj realigi viajn proprajn ideojn. Ne perdu la ŝancon kaj travivu ĉi aventuron – ĉar en la longdaŭra projekto de Eŭropa Volontula Servo eblas partopreni nur unufoje en la vivo.

Ĝis nun jam ok esperantistoj estis EVS-volontuloj en Bjalistoko (Christophe kaj Amélie el Francio, Guy el Britio, Zsófia kaj Dóra el Hungario, Arina el Rusio, Andrij kaj Nadia el Ukrainio).

Diversajn utilajn informojn en multaj lingvoj vi povas trovi ĉe la retpaĝo de la programo.

Por kandidatiĝi, bonvolu plenigi ĉi tiun formularon ĝis 2.08.2017.

Respondi