Eliza Orzeszkowa – Ĉe Nemano

Description

• Aŭtoro: Eliza Orzeszkowa
  
• Tradukis: Tomasz Chmielik
• Eldoninto: Bjalistoka Esperanto-Societo
• Eldonjaro: 2023
• Formato: 656 p., 170×240×39 mm. Malmola kovrilo. Libro kun paĝmarkilo
• ISBN: 978-83-962222-6-8

Ĉe Nemano (pole Nad Niemnem) estas soci-morala pozitivisma romano de Eliza Orzeszkowa el 1888. La trivoluma verko prezentas la panoramon de la pola socio en la dua duono de la 19-a jarcento, ankaŭ rilatante al la tempo de la Januara Ribelo. La romano unue estis publikigita en partoj en la Ilustrita Semajngazeto (Tygodnik Ilustrowany) de januaro ĝis decembro 1887. Libroforme oni eldonis ĝin en la Varsovia eldonejo de Gebethner kaj Wolff la sekvan jaron.

Stanisław Brzozowski nomis Orzeszkowa „pli juna fratino de Mickiewicz”. Populareco de la romano superis la atendojn de la aŭtorino, sed ĝi ankaŭ altiris la atenton de cenzuro: la unuaj eldonoj aperis sen riproĉoj, sed la planita kvara, en 1890, estis nuligita.

Ĉe Nemano estis la verko de la Nacia Legado en 2023. La traduko de Tomasz Chmielik estas la unua en Esperanto.

Dume al mi, kiu vivas en mia trankvila ejeto, ŝajnas, ke glaciegoj kovris la tutan mondon kaj estas superabundo da malvarmo. El la ĉielo sur niajn kapojn verŝiĝas malsereno kaj en tia malsereno ni estas preskaŭ kiel disŝutitaj pizoj kaj ĉiu pizo ruliĝas malkune kaj malkune putras… sen rikolto. Antaŭ longe inter la homoj estis alia pensado kaj aliaj intencoj, sed ĉiuj epokoj havas sian tempon kaj ĉio antaŭ la homaj okuloj fluas kiel akvo, flaviĝas kiel velka folio.